斑馬練个七月客語故事

        斑馬練个七月客語故事

日月跟艸連結婚後，遐時日月个屋下族還無分屋，故所就住在夥房曾祖母房間隔籬（阿太恁早就過逝矣，不過阿公更早行）个偏房！日月个出世地係在縱谷个南邊，日出晚日落亟个小鎮！日月同艸連个新房窗外就係養鵝个圍籬，有種幾墩破布仔樹。都講養鵝防蛇哥，不過養鵝好像毋做得避邪，正曉有後背个故事。

日月同艸連結婚後，照講新婚燕爾，係再正常不過个事，不過日月從第一日起，就無碰艸連，每天暗晡晚，上床倒頭就睡，艸連人也真夠單純，都無講甚麼，淨係納悶定定。一日接等一日，每天暗晡晚，日月還係講矣晚安轉身就睡熟矣，絲毫毋顧枕邊个新娘係自家自由戀愛從北部逐到南部个恁靚姑娘个感受。

遐陣子艸連吂曾比日月先入睡過，多半同姖比較敏感个心思及出嫁到後山異地有關。後來，艸連觀察到一件事，就係日月總係面向窗門遐側側睡，背對艸連。有一晚，日月睡等恁久矣，突然日月笑出聲音，恁像當開心个在跟人家講話个樣，艸連故所抬頭看日月个面朝个方向看，窗外，遐隻有風吹草動鵝群就曉伸頸狂喊个地方，居然就企等一隻白衫長髮女，無清楚个五官。鵝群居然都無驚動，不過艸連嚇死矣，隔一陣子，再探頭看，白影隱約還在，艸連講姖蓋等棉被打哆嗦整晚毋敢再入睡。

隔日朝辰頭，艸連問日月，暗晡晚都在跟麽儕講話，日月直講無呀，日月是常當老實敦笨溫文儒雅个公務人員，日月毋曉騙人个，也老實到毋曉逐問艸連做麼个恁問！艸連都毋敢將邇隻事告訴大夥房个其他人，看佢朝辰頭項床舉槌舉棍並無弍樣，就安靜毋講。日月係孤兒，家娘改嫁也無辦法問家娘，自家娘屋下又遠在山背後百裡背外，民國五十九年个當時，隔座山，就像外國一樣遙遠，農屋下个夥房也無安裝電話。

三隻月過去矣，日日重覆等沉悶得人驚个事，艸連也身心俱疲。有一晚，艸連突然想起，毑婆曾話畀姖知，有困難就唸觀世音菩薩聖號，菩薩祂聞聲救苦，一定曉幫助艸連个。故所，艸連開始默唸南無觀世音菩薩聖號，後來，越唸越發出聲音，越發出聲音就越勇敢越有信念，當時，艸連仍係背對遐扇窗个，就說心專石穿，忽然間，一道紫光閃過，艸連講个，姖看到白衫大士顯靈，在門唇个茶几，溫暖同煦个光畀艸連試著寬心，大士祂持等柳條往窗个遐邊甩矣甩，跟尾憑空消失矣！無對話，無聲響，艸連搖醒日月，日月還係睡眼惺忪个一無所知，連唯一个證人都當毋成矣。艸連自問，正經無？艸連講矣毋知得幾多次个「正經」。

從遐夜起，日月深夜再也毋曉對窗外微笑講話矣，而且對艸連恢復矣逐求姖時个溫柔與熱情，過毋久，艸連就懷矣細人仔，邇隻奇異个遭遇，也連緊日月分屋下離開大夥房，逐漸模糊矣記憶！